Bigarren eguna dute greban gaur Iruñeko aparkatzeko eremu urdina zaintzen duten langileek. Lanuzteen jarraipenarekin "kontent" azaldu da LAB sindikatuko ordezkari eta Dornier enpresako langile Elena Llanes: "Argi geratu da langileon borroka ezinbestekoa dela enpresaren jarrera aldatzea nahi badugu". Hitzarmen berri bat negoziatzen hasiak ziren enpresarekin, baina eten egin du prozesua aldebakartasunez Dornierrek: "Lan baldintza duinak izateko hitzarmena adostea ezinbestekoa da eta horregatik ateratzen ari gara kalera", azaldu du Llanesek. Grebaren segimendua %80koa izaten ari da. Elkarretaratzeak egiten dituzte: goizean Iruñeko udaletxe plazan eta arratsaldean Merindadeen plazan. "Soldaten igoerak exijitzen dizkiogu eta berritu ditzala eta hobetu ditzala gure lan baldintzak", eskatu du. 200 langile inguru ari dira eremu urdinaren zainketa egiten egunero Iruñean.