Lau urte pasa dira Nomofobikak taldeak “Sarean Kateatuak” antzezlanarekin “Poltsiko Antzerki Saria” irabazi zutenetik. 120 emanaldi baino gehiago egin dituzte, kultur-etxe, areto, plaza eta ikastetxeetan. “Orain, nomofobia bezalako gai batekin kritika eta umorea barra-barra zabaltzea lortu dugu.”
Nomofobikak proiektu berri batekin dator: “HACKERRAK”. Olatz Beobidek azaldu duen bezala “ Unibertso zabala dugu oraingoan: Robotika, adimen artifiziala, datuen lapurketa masiboa, cookiak, algoritmoak, etab.Gure harremanak egunetik egunera aldatuz doaz: gure lana robotizatzen hasi dira, GAFA (Google, Apple, Facebook eta Amazon) bezalako plataformek komertzio txikia ordezkatu nahi dute. Iraultza baten hasieran gaude: IV. industria iraultza. Gizateriak inoiz bizi ez duen hori, abiada bizian dator orain.”
Lan falta dela eta, hiru aktoreek onartzen dute robotika aztertzeko adimen emozionaleko proba batzuetan parte hartzea. Probak egin ahala beraien eginbeharra alboratu eta ozen adieraziko dituzte beraien sentipenak; hacker komando bat sortzeko beharraz arituko dira, edota oso lodia den Interneteko kablea mozteaz.
Autoretza: Ana Pérez, Olatz Beobide, Belén Cruz, Patxi Pérez
Antzezleak: Belén Cruz, Olatz Beobide, Arkaitz Garziandia. Zuzendaritza: Ana Pérez.