Maite Olano (LAB): "Zahar etxeak negoziotzat ditu patronalak"

Maialen Huarte Arano 2024ko api. 24a, 09:43

Zahar etxeetako langileek hitzarmena negoziatu nahi dute. 2021ean eseri ziren lehenengoz sindikatuetako ordezkariak patronalarekin, baina "blokeatuta" dago negoziazioa. Protesta "ikusgarri" ugari egiten ari da LAB sindikatua herritarrei iritsi dadin euren "haserrea". Iruñeko Santo Domingo aldapan eginen dute gaur aldarrikapena: "Sanferminetan zezenek korrikalariak nola, zahar etxeetan patronala langileak hala ditu", salatu du LAB sindikatuko ordezkari Maite Olanok. 

Protesta eginen dute gaur zahar etxeetako langileek Iruñean. 11:00etatik aurrera Santo Domingo aldapan izanen dira. Sanferminetan zezenek korrikalariak nola, patronala zahar etxeetako langileak hala dituela irudikatuko dute. "Lanaldi luzeak dituzte langileek. 365egunez eta 24 orduz daude zabalik erresidentziak. Korrika lan egitera behartzen dituzte, bestela ez dira denera iristen", salatu du LAB sindikatuko Maite Olano ordezkariak. 2021ean hasi zen hitzarmenaren negoziazioa, baina ez du aurrera egin: "Patronalak negozioa ikusten du zahar etxeetan zaintza lanak ikusi beharrean. Zahar egoitzetako langileak, gehienak emakumeak dira eta lan baldintza oso prekarioak dituzte", esan du.

Hitzarmena galdegiten ari dira zahar etxeetako langileak. "Ordutegi murrizketak jasoko dituen hitzarmena behar dute, abusuzko klausulekin amaituko duena eta baldintza hobeak ekarriko dizkiena", adierazi du Olanok.

 

Ekonomia Nafarroa

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!