Nafarroako Parlamentuan osoko bilkuran sartu aurretik Maria Txibitek iragarri du trafikoaren eskumena berreskuratzeko martxan jarriko duten prozedura: "Foru Hobekuntza aldatuko dugu". Horretarako, heldu den asteazkeneko gobernu bilerara akordio bat eramanen dute Lorafna aldatzeko eta Espainiako Gobernuari jakinaraziko diote.
Gobernu akordio horretan negoziazio batzorde bat sortuko da. Bertan izanen diren hiru ordezkari Nafarroako Gobernuaren presidenteordeak izanen dira —Felix Taberna (PSN), Ana Ollo (Geroa Bai) eta Begoña Alfaro (Zurekin Nafarroa)— eta Presidentetzako zuzendari nagusi Joseba Asiainek (PSN). Espainiako Gobernuarekin akordatu beharko dute zein testu erabiliko duten legezko aldaketa bat egiteko eta ondoren Gobernu bilkuran onartu beharko da. Nafarroako Kontseilura igorriko da gero eta berriz ere Gobernu bilkuran berretsi. Horren guztiaren ostean iritsiko da parlamentuko tramitazioa egiteko unea. Senatura ere iritsiko da lege organiko gisara eztabaidatzeko. Gerta daiteke PPk gehiengoa izanda gorte horretan betoa jartzea, baina Kongresura bidaliko lukete hala balitz eta bertan aurrera aterako litzateke.
"Nafarroako autogobernua zabaltzeko borondatea du Gobernu honek", berretsi du Txibitek. Lehen unetik Espainiako Gobernuarekin harremanetan izan direla jakinarazi du eta bi aldeek borondatea erakutsi dutela "eskumena Nafarroara ekartzeko".