Hiru nafar salkatu dira Bertsolari Txapelketa nagusiko finalaurrekoetako bigarren itzulirako. Julio Sotok azaroaren 26an kantatuko du, Baionako saioan. Joanes Ilarregik eta Saioa Alkaizak, berriz, abenduaren 3an, Bilbokoan.
Bertsolari Txapelketa Nagusiko finalaurrekoa jokatu zen larunbatean Durangoko Landako gunean, lehen itzuliko azkena. 2.000 lagun elkartu ziren saioa bertatik bertara gozatzeko. Ane Ezenarro Beristain gai-emailearen gidaritzapean sartu ziren sei protagonistak: Aitor Bizkarra Ruiz, Aitor Mendiluze Gonzalez, Beñat Gaztelumendi Arandia, Eñaut Martikorena Lizaso, Julio Soto Ezkurdia eta Saioa Alkaiza Guallar.
Aitor Mendiluze izan zen puntu gehien bildu zituen bertsolaria, 726,5 hain zuzen ere. Saioa irabazita, bigarren itzulirako zuzeneko txartela lortu zuen eta Bilbon kantatuko du abenduaren 3an. Larunbateko puntuazioak horrela geratu ziren: Aitor Mendiluze 726,5; Beñat Gaztelumendi 716,5; Julio Soto 686; Aitor Bizkarra 677,5; Saioa Alkaiza 662; eta Eñaut Martikorena 636,5.
Lehen itzuli osoan bezala, larunbatean ere hurrengo ariketak egin zituzten bertsolariek: binaka zortziko handian, txikian, puntutan eta seiko motzean; eta ganbarako lana, amaitzeko: “Lehen aldiz egin duzu negar haren aurrean. Lasaitua hartu duzu”.
Epaile lanetan zazpikote hau aritu zen, fase osoan bezala: Ainhoa Arregi Elosua, Bakarne Urreaga Etxeberria, Ekaitz Elorriaga Anduaga, Eneritz Azkue Basurko, Joseba Beltza Bengoetxea, Joseba Santxo Uriarte eta Maialen Berra Zubieta.
Bigarren itzulia, osatuta
Lehen itzuliko azken saioa izan zen larunbatekoa eta, hortaz, erabaki da zeintzuk izanen diren hurrengo fasean kantatuko duten bertsolariak. Horrela geratu da sailkapena.
- Agin Laburu Rezola
- Aitor Bizkarra Ruiz
- Alaia Martin Etxebeste
- Miren Artetxe Sarasola
- Oihana Iguaran Barandiaran
- Onintza Enbeita Maguregi
- Beñat Gaztelumendi Arandia
- Eñaut Martikorena Lizaso
- Julio Soto Ezkurdia
- Nerea Ibarzabal Salegi
- Sustrai Colina Acordarrementeria
- Unai Agirre Goia
- Aitor Mendiluze Gozalez
- Amets Arzallus Antia
- Joanes Illarregi Marzol
- Jone Uria Albizuri
- Maddalen Arzallus Antia
- Saioa Alkaiza Guallar
