Aralar elkarteak 25+1 urte bete ditu; iaz bete zuen mende laurdena. Baina, "tamalez", diote "erakundea oraindik beharrezkoa da". Ludopatia duten 2.500 pertsona daude Nafarroan. Arriskuan, berriz, herritarren ehuneko 1,6: 6.800 pertsona. Datuek erakusten dute, gainera, ludopatiak gero eta pertsona gazteagoak kaltetzen dituela.
1.100 pertsona artatu ditu 25 urteetan elkarteak. Emakumeengan arreta jarri nahi dute, gizonekin alderatuta somatu baitute genero rolen eraginez, beranduago eta larriago jotzen dutela laguntza eske.
Azken urteetan nabarmenki aldatu da jokoaren eremua. 2016tik legezkoa da online jokoa. Eskuragarriagoa da, ordutegirik gabekoa. Joko aretoak areagotu dira. 2016an baino 26 gehiago, asko parke eta ikastetxeen ondoan eta kirolari lotutako jokoak asko zabaldu dira. Elkarteak uste du araudi zehatza behar duela gaiak. Jokoaren foru legea egiteko borondatea eskertu du elkarteak, baina ausardia eskatu die politikariei.