Covid 19a dela eta, elkarteok bertan behera utzi zituzten amiantoarekin loturiko epaiketa bat izaten zen aldiro egiten zituzten elkarretaratzeak. Atzokoa etenaldi horren ondoko lehendabizikoa izan zen. Elkarretaratzeok "gizarte osoa eta, batez ere, parlamentuak eta administrazio publikoak amiantoaren arriskuaz kontzientziatzeko" egiten dituzte.
"Enpresek, bere garaian, material hori erabili zuten, kantzerigenoa baita eta bazekiten, baina oso moldakorra eta merkea da, eta ez zuten inolako eragozpenik izan segurtasun neurririk gabe erabiltzeko", kritikatu zuten. "Hori ez gertatzeko neurri guztiak jartzeko" eskatu zieten jarraian administrazio publikoei.
Era berean nabarmendu dute garrantzitsua dela Nafarroan Amiantoa Ezabatzeko Plan Zuzentzailea gauzatzea, betetzea; izan ere, "zerbait egin da, baina ez da martxan jarri", Estatu mailan "erreferentea" izanda.
Azpimarratu dutenez, pandemiak iraun bitartean "amiantoarekin harremana izan duten langileak ez dira aztertzen ari beharrezko maiztasunarekin", eta hori larritzat jo dute “gaixotasun horren diagnostiko goiztiarra oso garrantzitsua baita”.
Era berean, familiek prozesu judizialetara jotzen dutenean "basamortua zeharkatu behar dutela" kritikatu dute, "enpresek asetzeraino jotzen dutelako", eta horrela "prozesua amaitzea lortzen denean, lankide asko hil dira".