Nafarroako Parlamentuko Herritarrekiko Harremanetarako Batzordeak baztertu egin du astearte honetan Foru Gobernuak egindako Bizikidetza Plan Estrategikoa, Navarra Sumaren eta EH Bilduren aurkako botoekin.
Bart arratsaldean batzordean izandako eztabaidan, parlamentuko taldeek aurkeztutako 42 ebazpen-proposamenetatik 13 sartu dira Bizikidetza Planean. Horren ondoren, plan osoaren bozketa egin dute. PSN, Geroa Bai, Ahal Dugu eta Izquierda-Ezkerraren babesa jaso du, baina ez da aski izan aurrera atera zedin, Navarra Sumaren eta EH Bilduren artean gehiengoa baitute.
Navarra Sumak proposamena egin zuen ETA gaitzesteko eta talde terrorista gaitzesten ez duten alderdi politikoekin akordioak ukatzeko. Horren aitzinean, PSNk alternatiba bat aurkeztu du, "indar politiko guztiek edozein motatako terrorismoa eta bereziki ETArena gaitzesteko beharra" proposatuz, baina ETA gaitzesten ez dutenekin akordioak errefusatzea aipatu gabe.
PSNren proposamenak talde guztien babesa jaso du, EH Bildurena izan ezik. Esaldi hori sartzeak ekarri du EH Bildu planaren aurka agertzea. Era berean, Navarra Sumak PSNren proposamena onartu duen arren, uste du ez dela nahikoa plan osoa babesteko.
EH Bilduko eledun Bakartxo Ruizen arabera, “arazoa ez da gaitzespen hitza, arazoa da bizikidetza plan bat ezin dela inorentzako kotoiaren proba izan”. Navarra Sumako bozeramaile Iñaki Iriarteren aburuz, aldiz, “hemen oinarrizkoenaren falta sumatzen da, EH Bilduren egiazko gaitzespen bat”.
Bakearen, Bizikidetzaren eta Giza Eskubideen Zuzendaritza Nagusiak prestatu du Nafarroako Bizikidetzaren Plan Estrategikoa, Bizikidetzaren eta Giza Eskubideen Zerbitzuaren bidez, biak Herritarrekiko Harremanetarako Departamentuari atxikita.
Plana sei ardatzen inguruan egituratzen zen: giza eskubideak aplikatzea, terrorismoaren biktimen eta indarkeria politikoaren eskubideak babestea, memoria kritiko eta inklusiboa eraikitzea, tolerantziarako hezkuntza, aniztasunean oinarritutako bizikidetza eta elkarrekin bizitzeko erakunde erreferenteak eratzea.
Parlamentuan ebazpen-proposamenak eztabaidatu eta bozkatu bitartean, Navarra Sumaren hiru ekimen onartu ziren, jaien despolitizazioa lortzeko lan egiteko; ezker muturreko talde terroristen eta mota horretako indarkeria politikoaren jarduera barneratzeko; eta Estatuko Segurtasun Indar eta Kidegoen eta haien familien aldeko eta haien aurkako jazarpen-kanpainak gaitzesteko ekintza bat sustatzeko.
Era berean, EH Bilduk sinatutako sei ebazpen-proposamen onartu ziren. Bilera horietan, Bizikidetza Planari izaera "transbertsala" ematearen alde egiten zen, "gobernuaren beste plan batzuekin bat etor daitezen bere jardunak, hala nola migratzaileak hartzeko planekin, arrazakeriaren eta xenofobiaren aurkakoekin, gizarteratzearen aldekoekin, LGTBI Berdintasunarekin, Partaidetzarekin, Gazteriarekin edo Euskararekin zeharkako eragina dutenekin".
Era berean, Partaidetza Demokratikoari buruzko Foru Legea eremu guztietan garatu eta ezartzearen alde egin zen, eta bizikidetza indartzearen alde, bereziki gazteriaren eta emakumeenganako indarkeriaren eremuan, gizarte-bazterkeriaren arriskuak areagotuz. Bizikidetzaren alorrean ere, hezkuntza-eremuan eta erakunde publiko guztien jardunean laikotasuna sustatzea eskatzen zen.
Aurrera egin zuten azken hiru proposamenak Ahal Duguk eta I-Ek sinatu zituzten, planaren helburu estrategiko eta orokorren artean honako printzipio hauek kokatzeko: "Berdintasunezko sozializazioa eta erabateko inklusioa, gainerakoekiko bizikidetza-arauak eta balio demokratikoak errespetatuz".