Familia batzuek gela bat dute bizitoki, logela bakar bat, sukaldea eta egongela ere badena. Iruñeko Udalak eta Etxekaleratzeen Kontrako Plataformak bizitoki duinik ez duten horien errealitatea ikusarazi nahi dute, eta horregatik, logela bakarrean bizi direnen inguruan erakusketa bat eta hitzaldi bat prestatu dituzte.
Logela bat ez da etxe bat erakusketa atondu du Ivan Benitez argazkilariak, hamasei irudirekin, Plataformaren kanpaina zabalago baten karietara egindako lana da; gaur jarri eta ekainaren 3ra arte izanen da ikusgai, hasieran Kondestablen eta, gero, Sanduzelaiko Civivoxean. Bertan argi eta garbi ikusten da errealitatea: gela bakarrean bizi direnak, familia beren gain hartuta, emakumeak dira: den-denak. Feminizatutako arazoa da zaintza lanak bizkar izanda etxerik ez izatearena. Laura Berro berdintasun zinegotziak azaldu du "heteropatriarkatuaren beste aurpegietako bat" dela muturreko errealitate hori.
Etxe Kaleratzeen Kontrako Plataformako kide Maria Equizak azaldu du egoeraren gordina. Plataformak egoera horretan dauden 70 emakume zenbatu ditu, horiek, haatik, "izozmendiaren gailurra baizik ez dira". Horren aurrean, konponbidea, zein: "etxebizitza duina lortzea".
Mahai ingurua, lehen pertsonan
Gela bakarrean bizi direnek etxebizitza eskubidea bermatuta ez dutela azpimarratu dute. Bizitegi bazterketa "familiaren arduratzat" hartua izan da, "ardura publikoa" dela ahantzita eta hori salatu nahi izan dute gaur. Hain zuzen ere, ildo berean atonduko dute asteazkeneko mahai ingurua. Luisa Jusue gizarte langileak, Ruth Iturbide ikertzaileak eta Philomena Ebere gela bakarrean bizi den emakumeak hartuko dute parte. Kondestablen izanen da, asteazkenean 19:00etan.
