Iruñeko hamahiru liburu-denda kalera aterako dira apirilaren 24an, astelehenarekin, Liburuaren eguna sustatzeko, beherapenen eta 4.000 lore oparitzearen bitartez. Aurten ere liburu-dendak herritarrengana gerturatuko dira salmenta-postuak jarriz Karlos III.aren oinezkoendako gunean, Orreaga etorbidearen ondoan. Eta astelehenean egingo dute (apirilaren 24an), Liburuaren eguna (apirilak 23) igandea delako, eta dendak itxita daudelako. Horregatik, Liburu Saltzaileen elkarteak azoka astelehenean egitea erabaki zuen.
10:00etatik 21:00etara, etenik gabe, liburu-dendek salmenta-postuak jarriko dituzte eta liburuetan % 10eko murriztapenak eskaini, loreak oparitzeaz gain -aurreikusitako 4.000 aleak agortu arte banatuko dituzte-.
Parte hartuko duten liburu-dendak honako hauek dira: Auzolan, Chundarata, Elkar (bi postu), Gómez, Katakrak, Troa, Walden, Iratxe, Deborahlibros, Arista, Nerea eta Abarzuza. Postuetan egiteaz gain, dendetan ere % 10eko murriztapena egingo da.
Liburuaren eta Lorearen Eguna Iruñeko Udalak antolatzen du, Diego de Haro Liburu-saltzaileen Elkartearekin elkarlanean. 2017. urte honetan hamar urte beteko ditu. Jarduera honekin Iruñeko Udalak bat egiten du berriz ere Liburuaren Nazioarteko Egunarekin, Diego de Haro Liburu-saltzaileen Elkartearekin elkarlanean, eta, hartara, hiriko liburu-dendak ezagutzera ematen ditu, bai eta gertuko denda gisa balioesten ere. Halaber, liburuak eta loreak protagonista dituen egun honetan Iruñeko erdigunea dinamizatzen da eta ordu batzuetan zehar iruindar guztien arteko topagune bihurtzen da, kultura ardatz hartuta.