Nafarroako herri izenek ez dute bat eginen, oraindik ere, Euskaltzaindiak emandako irizpideekin. Bilduk mozioa aurkeztu zuen atzo parlamentuan, hala izan zedin, baina Ahal Duguren eta Ezkerraren aldeko botoak jaso bazituen ere, Geroa Bai abstenitu egin zen eta UPNren, PSNren eta PPren kontrako botoekin proposamenak ez du biderik egin.
Mozioa, puntuz puntu
Honako hau dio mozioak: “Euskarari buruzko 18/1986 Legeak agintzen duena betez, Nafarroako herrien izen ofizialak erabaki ditzala, horretarako erakunde aholku-emaile ofizialaren –Euskaltzaindia– irizpenari jarraituz”.
Bigarren puntuan, Foru Gobernuari eskaera hau egin dio: “herrien izen ofizialak erabaki ondoren, izen horien erabilera esparru guztietan heda eta normaliza dezala, besteak beste, errepideetako eta bideetako seinalizazioan, kartografian eta, oro har, argitalpen guztietan, bereziki erreparaturik hezkuntzaren eta kulturaren alorrei”. Hori guztia, “horretarako behar den plangintza eta programazioa eginez eta behar beste baliabide esleituz”.
EH Bilduk bultzatutako mozioak gogorarazi du Euskaltzaindiak egina daukala aspaldi Nafarroako herri izen guztien zerrenda, gaztelaniazko nahiz euskarazko aldaerak jasota, eta bertan zehazten dela herrien izen ofizialak zein izan beharko luketen.
Orain arte bete gabe
Nafarroako Gobernuak, ordea, “ez du orain arte legeak esleitu dion egiteko hori gauzatu, eta, udal jakin batzuek bultzatuta ofizial bihurtu diren zenbait herri izen izan ezik, gainerako kasu guztietan –eremu euskaldunean izan ezik–, gaztelaniazko aldaera da gaur egun ofiziala den bakarra, eta herrien euskarazko izenek ez dute ofizialtasunaren mailarik lortu, horrek dakartzan ondorio guztiekin, errepideetako errotulazioan nahiz kartografia ofizialean, besteak beste”, esan du EH Bilduk.
Geroa Baik, zuzenketa
Geroa Baik zuzenketa bat aurkeztu du: “Lan horretan beti errespetatu behar da udalen autonomia, Nafarroako Toki Administrazioari buruzko uztailaren 2ko 6/1990 Foru Legean jasota dagoen bezala”. EH Bilduk, ekimenaren titularrak, ez du onartu.
