Artzainak eta txakurrak. Horra hor Uharte Arakilen atzo ospatutako Artzai Egunaren 49. aldiaren protagonista nagusiak. Eta denen artean izen bat: Joxe Mari Ixtilart. Hark irabazi du lehiaketa, "Lagun" txakurrari esker eskuratu du lehen postua. Baina ez du hori izan garaikur bakarra: bigarren postua ere lortu du, "Bizkor" txakurrari esker.
51 urte dauzka Ixtilartek eta 39 urtetan aurkeztu da lehiaketara. Lehenengo aldiz, ordea, atzo jantzi zuen txapeldunaren txapela. Orain, Euskal Herriko lehiaketa nagusian ariko da, irailaren 17an, Bizkaian.
Egun berezia izan da, gainera, Ixtilarterentzat, haren ama Pilar Elizalde omendu dute eta. Hura izan zen Artzai Egunean ibilitako lehen emakumea.