Parlamentuak "arbuio erabatekoa" adierazi du NUPeko errektorearen aurka egindako "irainen" aurrean. Ez aho batez, ordea. UPNk, Geroa Baik, PSNk eta PPNk babestu dute erregionalistek aurkeztutako idazkia. EH Bilduk, Ahal Duguk eta Ezkerrak ez dute babestu.
Erregionalisten proposamenaren harira, gertatutakoaren inguruko xehetasunak jorratu dituzte aurka bozkatu duten taldeek. Esaterako, Ezkerrako Jose Nuinek oroitarazi du Polizia ikasleen kontra oldartu zela, eta hori ez zela "bidezkoa" izan.
Perezek (Ahal Dugu), bide beretik, aipatu du "elkarrizketa bide guztiak" ez zirela agortu.
Geroa Baiko Koldo Martinezek, ostera, protesta eskubidea defendatzen duela dioen arren, "protesta era guztiek mugak" dauzkatela esan du. Hori dela eta eman dio haren taldeak sostengua UPNren adierazpenari.