Milaka lagun atera ziren atzo kalera kalitatezko enplegua aldarrikatzeko. Iruñean, lau izan dira manifestazioak.
UGT eta CCOO sindikatuek elkarrekin egin dute protesta. "Soldaten pobreziaren eta txirotze sozialaren aurka. Lana eta eskubideak" goiburua zuen pankartarekin atera dira kalera. Lan erreformak abian segitzea kritikatu du Javier Lekunberri UGTko idazkari nagusiak. Comisiones Obrerasek gaineratu du politika neoliberalen emaitzen ondorio lazgarriak utzi dituztela Raul Villarren esanetan.
LABek Gazteluko plazan amaitu du bere ibilbidea. "Euskal Herria prekarietatearen aurka. Eskubideak aktibatu" izan dira pankartako hitz larriak eta Igor Arroyo idazkari nagusiak nabarmendu du sistema publikoaren alde egin behar dela lan, praktika sindikala indartzera jo behar dela "independentismotik, sozialismotik eta feminismotik".
ELAk bere aldetik Udaletxeko plaza aukeratu du manifestazioaren amaierarako toki. Prekarietatearen aurka eta hitzarmenen estatalizazioaren kontra egin dute protesta. "Gehiago balio dugu" goiburuarekin Mitxel Lakuntza sindikatuko koordinatzaile nagusiak nabarmendu du hain zuzen prekarietatea dela gizarteak duen arazorik larrienetakoa.
ESK, CGT, CNT, Steilas eta Solidarik bat egin dute lantokietako eta gizarteko prekarietatea salatzeko. Norbanakoen borrokaren gainetik, borroka kolektiboak indar hartu behar duela uste dute. Lana banatzeko eta aberastasuna banatzeko beharra dagoela nabarmendu dute antolatzaileek.