EiTBrako irudiak grabatzen ari zela "kalejirako hainbat pertsonaiek" eraso sexista egin ziotela salatu du Fase 3 S.A langileak. "Eraso sexista pairatu dut hainbat pertsonen eskutik, identifika ezinak zaizkidanak, estalita zeudelako. Batek atzetik hartu ninduen, eta nire kontra igurtzi zen, ni nire lana egiten ahalegintzen nintzen bitartean", adierazi du.
Ez da hori izan bakarra, zoritxarrez. "Bigarren batek makil bat sartu zidan hanka artetik, mugimendu bertikalak eginez. Azkenik, hirugarrengoak bultza egin ninduen ia-ia oreka galtzeraino; gero, besoetan hartu ninduen, astintzeko".
Gertatu zaiona salatu egin du, ahoan bilorik gabe: "Gaitzetsi egiten ditut halako jokaerak emakume, pertsona, bai eta profesional gisa ere". "Gisa horretako gertaerak" toleratu ezin direla azpimarratu du. Haren irudiko, "festa, inauteriak, ekitaldi publikoak" ez dira aitzakia. Era berean, pairatutako lehenengo bi gertakariak "generoarekin lotutakoak" dira, haren hitzetan. "Genero maskulinoko nire lankideek ez zuten niri gertatutakoaren gisakorik bizi", jakinarazi du.
Bestalde, Ziripot pertsonaiak zerikusirik ez du izan, jakinarazi duenez; izan ere, horrela zabaldu dute hainbat hedabidek, eta kamerariak ukatu egin du.
Jasotako babesa eskertu, eta Lantzeko herria "kriminalizatu" nahi ez duela adierazi du, "pairatu duen gertakari hori" baino ez duela arbuiatu argitu du.
