Aztnugal. Laguntza hitza aldrebes idatzita. 2011ko urtarrilaren 18an atxilotu zituzten bost nafarrak, eta inkomunikazio bitartean egindako polizia deklarazioa lelo horrekin sinatu zuen Jon Patxi Arratibelek. Torturak salatu zituzten denek.
Orain, haien kontrako prozesuak aurrera darrai. Erakunde armatuko kide izatea egozten diete. Haien hitzetan, "zentzugabekeria" da aurrera segitzen duena. Izan ere, Espainiako Auzitegi Nazionalak tortura salaketak ez dituela ikertu salatu dute.
"Ikaragarria da XXI. mendean, estatu espainiarrean, tortura salaketen aurrean beste alde batera begiratzen jarraitzea", esan dute. Halaber, Espainiak giza eskubideen urraketa "iraunkorra" egiten duela izan dute kritika gai.
Horregatik, laguntza. Bi zentzutan: lehenik eta behin, torturarekin amaitzeko; bigarrenik, gatazka politikoarekin amaitzeko.