"Administrazio eraginkorragoa behar dugu, kanpora begira aritzen dena barrura begira baino gehiago, formalismoetan gutxiago ariko dena eta herritarren eskubideengatik gehiago arduratuko dena", esan du Javier Eneriz arartekoak.
Memoria historikoa, euskara, funtzio publikoa, gizartearen ongizatea, hezkuntza, osasuna, ingurumena, ogasuna, herritarren segurtasuna eta hirigintza dira kexa gehien jaso dituzten arloak, hurrenez hurren.
Txostena, datuz datu
Nafarroako Parlamentuak txostenean bildutako datu zehatzak eman ditu jakitera, haren webgunean.
Nafarroako Administrazio Publikoek 115 iradokizun, 233 gomendio eta 84 legezko betebeharrei buruzko oroigarri jaso dituzte (432 erabaki osotara). Hori guztia, 11.494 herritarrek erakundera jo dutelako, besteak beste, ia 1.223 kontsulta egiteko eta 2.742kexa aurkezteko (1.045 espediente kudeatu dituzte), horien %78,5a izapidetzeko onartuak eta %74,6a funtsatua. 2001ean erakundea abian jarri zenetik kexa gehien egon den urtea izan da eta 631 ikerketa egin dira (2013an 736).