Nafarroan eskela gehien saltzen dituen egunkariak dakar albistea, azalean, bost zutabera, hizki larriz: Vianako Printzea plazan formula aritmetikoa topatu dute aldaketaren gobernua zapuzten ahalegintzeko. UPN + PSN + PP + IE = 26. Bistan da gehiengo osoa bermatuko lukeen hizki zopa hori ideologikoki irensten zaila dela. Erregionalisten betiko errezeta erabili dute justifikatzeko: “abertzalerik gabeko gobernu konstituzionalista” bermatuko litzateke. Enegarren aldiz, mamu identitarioa, baskoak datozenaren mehatxua.
Nolanahi ere, bistan da “abertzalerik gabeko gobernu konstituzionalista” horri beste modu batean ere deitzen ahal zaiola, esate baterako, fronte Espainiazalea. Espero zitekeenez, IEk berehalakoan ezezko batekin erantzun dio Esparzaren proposamenari.
UPNko zerrendaburu Javier Esparzak honako modu honetan justifikatu nahi izan du proposamena: “Bozkatuenak izanagatik ere urrats bat atzera egin behar badugu egonkortasuna eta Nafarroak Nafarroa izaten segituko duela bermatzeko, halaxe eginen dugu. Nire alderdia arduratsua da, eta badaki une honetan zer den garrantzitsua: abertzaleei aurre eginen dien Nafarroa konstituzionalista bat”.
