Nafarroako Argazkilarien Elkarteak 2023ari dagokion erakusketa zabaldu du gaur Corte Ingleseko zortzigarren solairuko Kultur Aretoan. 32 irudi dira eta beste bi, omenaldi gisara baliatu dituzte hil berri diren Calleja anaiei eskainiak. Aurten, bigarren aldiz, bideografia ere izanen da ikusgai pantaila erraldoi batean.
Lesakako zubi gaineko dantzariak, Altsasuko momotxorroak, ardiak larrean lasai jaten ilunsentian, Osasunako jokalariak garaipena ospatzen, Palestinaren aldeko manifestazio bat edota Caravinagre kilikia ageri dira argazki bilduma horretan. Denek dute zerbait kontatzeko ahalmena. Hain zuzen, argazkilariek eurek diote, adimen artifizialaren garai hauetan eta edozeinek argazkiak egin ditzakeen une hauetan profesionalek "zilegitasun eta egiazkotasuna" ematen dietela kontatzen ari diren horri.