Afixa ugari azaldu dira egunotan Iruñean eta Iruñerriko zenbait herritan. Zerbait eraikitzen ari da goiburua daramate kartel horiek eta gaztetxe bat sortzearen aldeko kanpainaren parte dira. Iruñerrian gazteek euren ekimenak aurrera eramateko gune bat eraikitzeko proposamena litzateke. Sare sozialetan, goiburu hori erabiltzeaz gainera, diote, “erresistentzian denbora luzean izan ondoren orain eraikitzeko garaia da”. Iruñerria berpizten taldea ari da proiektu hori garatzen. Herritarrak eta gizarte eragileetako kideak ostegunetan biltzen dira Kalekalden eztabaida sortu eta gaztetxe bat eratzeko aukerak planteatzen.
Autogestioa xede izanda Iruñerian izandako esperientziak gogoratu dituzte: Katakrak, Loretxea, Euskal Jai, Tximista, Irule… horregatik egitasmo horiei jarraiki berriak eraikitzea dute asmo. “Gaztetxeak isilarazi nahi izan zituzten, gazteak alboratu nahi izan zituzten, lurperatu egin nahi gintuzten baina ahaztu zuten haziek aurrera segitu dutela”, adierazpen horrekin jakinarazi dute abian direla egitasmoa eskuartean dutela.
Gaztetxea sortzea da helburua eta gune horretan zer izanen den ere adosten ari dira: lantegiak, elkartrukerako saltokia, dokumentaletarako lekua, gizarte eragileek erabilgarri izanen luketen txokoa, liburutegia, euskaltegia, hacklab, kontzertuak egiteko gunea, jantokia, euskal presoekiko elkartasun txokoa eta beste. Hori horrela, deia herritarrei egin diete parte hartu dezaten proiektu horretan eta ostegunetako bileretan Kalekaldera bertara daitezen.