Bihar eta ostegunean izanen dira udaberrirako Barañaingo Sahats euskaltegiak antolatu dituen hitzorduak. "Euskara kalera ateratzea eta herritarrekin elkarreragina sortzea" da helburua. Hasteko, bihar lan saioa antolatu dute: Hizkuntzaren eskubideak izenarekin Behatokiko zuzendariak, Garbiñe Petritegik, mahai inguruan eskainiko ditu euskaraz bizitzeko Nafarroan herritarrek dituzten eskubideak. Gakoak eta informazioa helaraziko ditu Petritegik 20:00etan euskaltegian.
Musika ardatz hartuta, ostegunean, Haizea elkartean izanen da ikuskizuna. Imanol Epeldek gidatutako Etxepare Rap taldea ariko da kantuan. Musika emanaldia eskainiko du 19:00etatik aurrera.
Atzo ekin zion Barañaingo Sahats euskaltegiak udaberrirako antolatu duen ekitaldi sorta eskaintzeari. Pako Aristik hitzaldia eman zuen liburutegian Euskararen isobarak izpide.