22 urterekin egin zuen bere buruaz beste Unai Salanuevak. Intsumisoa zen eta etxeko leihotik bota zuen bere burua 1997ko otsailaren 10ean. Hain zuzen, hurrengo egunean, otsailaren 11n zen itzultzekoa espetxera zerbitzu militarra ez egiteko hartutako erabakiarengatik. Larunbatean Txantrean gogorarazi zuten auzokidearen heriotza: "Estatuaren gordinkeriak bultzatu zuen Salanueva bere buruaz beste egitera. Beste gazte asko bezala ez zegoen prest zerbitzu militarrak eskaintzeko eta intsumiso izan zen, desobeditu egin zuen. Espainiak jarritako inposizioak hil zuen Salanuva", irakurri zuten auzokideek.
Unairen Txokoa Unai Salanuevaren plaza izendatzea nahi dute ofizialki. Horretarako dagoeneko 1.000 sinadura bildu dituzte. Oraindik ere sinatzeko aukera bada, auzoko elkarteetan utzi dituzte horretarako agiriak.
