Thessaloniki (Grezia) hirian hartu ditu atxilo bi iruindarrak Greziako Poliziak, migratzaileei eta errefuxiatuei aterpe ematen zieten hiru etxe okupatu hustean. Nazioarteko ekintzaileak, errefuxiatuak eta migratzaileak atxilotu dituzte operazio horretan.
Utzarazi dituzten eraikin okupatuetan, ehunka migratzaileei eskaintzen zieten laguntza. Nikiz izena zuen horietako batek, propio errefuxiatutako sendiei babesa emateko sortua. Orfanotrofeio deiturikoa zen beste bat: berrokupatu egin zuten hainbat eragilek, hutsik egon ostean, autogestioaren bidetik erantzunak eman nahian errefuxiatuen egoerei.
Iruñean elkarretaratzea egin zuten atzo bi atxilotuak aska ditzaten exijitzeko, eta kalejiran joan ziren Nabarreriaraino ehun lagun inguru. Gaur goizean, bi lagunak karguekin libre uztea da litekeena.
Uztailaren 16an atera zen Greziarako karabana, Europar Batasunaren mugak eta migrazio politika "kriminalak" salatu eta errefuxiatuei eta migratzaileei elkartasuna adierazteko xedez.
Arropa eta botikak, galduta
Greziako eragile askok gertatutakoa salatu dute, eta eraikinak hustearekin bat, botikak eta errefuxiatuentzako arropa galdu dela diote. "Gobernuaren ekintza kriminala" izan da etxe okupatuak hustea, euren aburuz.