Ostia sagaratuekin Pederasta hitza idatzita darama Amen izeneko lanak, eta tirabira bizia piztu du kalean eta sare sozialetan. Baina udalak eta artistak erakusketa irekita mantentzea erabaki zuten atzo arratsaldean. Erakunde eta norbanako ugarik eskatu diote Azkonari eta Iruñeko Udalari performancea erakusketatik erretiratzeko, herritar askoren sinismenen aurka egiten duelakoan. Udalak ere egin zion eskaera artistari, erakusketako hainbat edukik arbuioa eragin dutela ikusita. Atzo, ados jarri ziren udala eta artista, eta erakusketa irekita egonen da urtarrilaren 17ra arte. Dena dela, ez da izanen ostia sagaraturik, obraren zati hori kentzea adostu baitute.
Atzo arratsaldean Serapio Esparza plazan eta erakusketan bertan ehunka kristau elkartu ziren, errezatu eta Azkonaren lana gaitzesteko. Herenegun, Gazteluko plazan egin zuten bilkura 200 sinestun inguruk.