Nafarroako Gazte Asanblada Transmarikabibollera taldeak, Lugatibek alegia, salaketa jarri berri du. Joan den asteburuan eraso homofobo bat pairatu zuen talde horretako bikote batek. Kaldereria kalean zihoazen goizaldeko ordu bata aldean. Elkarri muxu ematerakoan hasi ziren mehatxuak eta isekak. Mutil gazte bat izan zen iraintzen hasi zitzaiena beste gazte talde batekin zelarik. “Muxu ematen segitu genuen gure kolektiboko kide gehiago inguruan genituela. Ez dugu halako erasoen aurrean lotsatzeko edo burua makurtzeko asmorik. Gure sexualitatea modu naturalean bizi dugu bai etxean baita kalean ere, zenbaitek onartzen ez badute ere”, azaldu dute erasotuek.
Foruzaingoan jarri dute salaketa
Eraso homofobo baten aurrean Foruzaingoak zer egin argi ez duela uste du bikote erasotuak. Salaketa jartzera jo zuten eta tratua egokia izan bazen ere zalantzak nabaritu zituzten Foruzainarengan. Lugatibetik erasoen aurkako protokoloa eratzeko asmoa ere nabarmendu dute.