Erraldoi eta Buruhandien konpartsa larunbat arratsaldean eta igande goizeko prozesioan hartuko dute parte, Udal dantzariekin eta La Pamplonesa musika bandarekin batera. Honetaz gain Udal txistulari eta gaitariak dianetan arituko dira.
Maider Beloki, Kultura, Hizkuntza Politika, Hezkuntza eta Kiroletako zinegotzia, Toni Iragi, Eneko Yoldi eta Ekhiotz Lacasta Alde Zaharreko Jai Batzordeko kideekin bildu da gaur arratsaldean. Bilera honetan zinegotziak jakinarazi die Udalak bere gain hartuko dituela hiritarren segurtasunerako beharrezkoak diren neurriak, tabernetako ordutegien zabalpena eta Erredinen barra kokatzeko lanak. Modu berean zakarrontzi gehiago paratuko direla eta Jai Batzordeak eskatzen dituen hesiak eta argindarraren egiturak eskainiko dizkietela adierazi die Maider Belokik. Bukatzeko sei komun kimiko jarriko direla Erredinen, Zaldi Zurian, Jauregiaren Aldapan eta Kaldererian iragarri du zinegotziak.
Irailaren 25,26 eta 27an 150 ekitaldi baino gehiago eginen dira Iruñearen festa txikietan, haien artean herri streptease bat, “karrozen” lasterketaren XXXVgarren edizioa eta irrintzi lehiaketa bat.