Podemos-Ahal Dugu-ko 1.500 afiliatuek bihar arratsaldera arte itxaron beharko dute jakiteko haien alderdiak zer eginen duen Iruñeko udal hauteskundeetan. Atzo abiatu zuten internet bidezko bozketa eta atzo bertan zen amaitzekoa, baina arazo teknikoak eduki ei dituzte, eta hori dela kausa gaur ere eman ahal izanen da botoa internet bidez. Emaitza bihar arratsaldeko lauetan ezagutaraziko dute.
Podemoseko afiliatuek bi aukeraren artean hauta dezakete. Lehena, Aranzadi hautesle elkartea sostengatzea. Bigarrena, Cambiar Pamplona alderdi instrumentalaren alde egitea eta Izquierda Ezkerraren eskutik aurkeztea.
Bestalde, Diario de Noticias egunkariak argitaratu duenez, Podemosen sostengua jasoko ez balu Aranzadik berdin segituko luke aurrera hauteskundeetara aurkeztera daraman bidean. Hiru mila berme behar ditu aurkeztu ahal izateko, eta horiek apirilaren batetik 20ra bildu nahi ditu.