Administrazioan Euskara erabiltzeko dekretuaren zirriborroari egindako aldaketak kritikatu ditu EH Bilduk, "kontrako norabidean" doazela sinetsita: "estiloa eta erredakzioa" dira Nafarroako Gobernuak aldatu dituenak, eta, hala, dekretuaren zirriborro honek lehengoak baino "konpromiso gutxiago" hartzen ditu. "Leunagoa da", Dabid Anaut EH Bilduko parlamentariaren hitzetan.
"Euskararen normalizaziorako erreminta nagusia" da dekretua, Euskararen Legea aldatzeko "nahiako adostasun" ez dela kontuan izanik, Anautek esan duenez.
Lehengoa "gazi-gozoa" bazen, "honek gehiago du gazitik gozotik baino": zonaldearen arabera irizpideak aldatu ditu Nafarroako Gobernuak; "konpomiso gutxiago" daude; zerbitzu zentralei dagokienez, barne funtzionamenduaren atal guztia "desagertu" da; eta, aldi berean, funtzio publikoan aritzeko "meritu zenbaketa egiteko era aldatu dute".
Adibide txiki bat: Nafarroako Gobernuak “neurriak hartuko ditu” zioen, lehen, testuak, hainbat ataletan; orain, ordea, “neurriak har ditzake” dio. Alegia, ez du betebeharrik ezartzen. EH Bilduri ez dizkiote “behar zen garaian” aldaketak jakinarazi, gaur goizean esan duenez. Ingurumari horretan, euskararekiko "ausardia" eskatu dio EH Bilduk Nafarroako Gobernuari, "urrats sendoak".
