Min gehien ematen duen tatuajea. Hori da Ijitoen Idazkaritza Fundazioak “diskriminazioaren aurka eta duintasunaren alde” irailaren 6an abiatutako kanpaina. Sare sozialetan #ElTatuajeQueMasDuele leloarekin argazkiak zabaltzen ari dira.
Amanda izeneko ijito gazteak egindako protestatik dator leloa: Ijitoa naiz eta fidatzekoa naiz tatuatu zuen besoan, egiturazko bazterketaren aurka, eta, horren ostean, aurreiritzien kontrako kanpaina jarri zuen martxan Ijitoen Idazkaritza Fundazioak, Espainiako estatuan. Gaur goizean, Nafarroak ekin dio dinamikari, Nafarroako Ijitoen Idazkaritza Fundazioaren eskutik.
Eguneroko ogia
“Diskriminazioa egunero bizitzen dute ijitoek” eta hura “agerian jartzea” zein “gaiari arreta handiagoa jartzea” dira kanpainaren xedeak.
Helburu zehatzak finkatu dituzte, diskriminazioarekin bukatzeko neurriak: “Botere publikoek berdintasunerako eskubidea eta duintasuna gehiago babestea”; berdintasunaren aldeko osoko lege bat sortzea, “bere gain hartuko dituena Europako arautegiak ezartzen dituen eskumen eta erantzunkizun guztiak”; gorroto eta diskriminazio delituetarako zerbitzuen jarduna “sustatzea”; eta gizartea “sentsibilizatzea”.