Joan den abenduaren 23an eraman zuten Europako Giza Eskubideen Auzitegira Josetxo Arizkuren 'Kantauri' Iruñeko presoaren kasua haren abokatuek (tartean, Amaia Izko). Familia bizitzarako eskubidea izan da aurkeztutako argudio nagusia. Nabarmendu dute presoak beren ingurunetik urrun izateak familia bizitzarako eskubidea urratzen duela. Besteak beste, zailtasunak dakartzalako bisitetarako eta gainerako harreman bideetarako.
Arizkuren 1999an atxilotu zuten, Parisen, eta preso eduki dute geroztik. 2006an, Frantziak ezarritako zigorra bete, eta Espainiaratu egin zuten. Auzitegi Nazionalak hainbatetan epaitu eta zigortu du ETAko kide gisa. Kardiopatia iskemiko larria du, eta horregatik zegoen Euskal Herriratze eskaerak egiteko lehen multzoan, 70 urtetik gorako presoekin batera. Iazko ekainean, Galiziako A Lamako kartzelatik Murtziakora aldatu zuten. Familiak kezka zuen osasun arreta egokirik emanen ez ziotelako.