Egia, aitortza eta erreparazioa. Horixe eskatu zuten atzo Angel Berruetaren senide, lagun eta auzokoek. Duela 11 urte hil zuten Berrueta, 2004 martxoaren 13an. Polizia nazional batek tiro egin zion. Ez zen lanean ari. M11ko atentatuak ETAri egozten zizkion afixa jarri nahi izan zuen Berruetaren okindegian, eta hark ez zion utzi.
Angel Gogoan plataformak antolatu zuen atzoko ekitaldia. Plataformakfamiliak urte hauetan guztietan erakutsi duen diontasuna nabarmendu du. Berriki Nafarroako Parlamentuan izan da familia, eta han azaldu du hilketaren ondotik jazartuak izan direla, eta telefonoz hamaika mehatxu pairatu dituztela.
Plataformatik egia osoa jakin nahian dabiltzala diote: "Oraindik bada jendea dioena bizilagunen arteko eztabaida izan zela, nahiz eta jakin, arrazoi politikoengatik planifikatutako hilketa bat izan zela", nabarmendu dute. Aitortza ere ezinbesteko jo dute, "erakundeengandik eta bereziki Nafarroako Gobernuarengandik aitor dezatela gertatutakoa, eurak baitira egia eta justiziaren defendatzaile". Gainerako biktimek merezi duten "ordaina" Berruetarentzat ere eskatu dute.
