Nafarroako Gobernuak babes ofizialeko 542 etxebizitza eraikiko ditu Iruñerrian, alokairuan eskaintzeko. Exekutiboak hala erabaki du gaurko bilkuran, eta 75 milioi euro bideratu ditu zeregin horretara.
Nafarroako Gobernua Nasuvinsa enpresa publikoaren bidez prestatzen ari den Etxebizitza Planaren barruan gauzaturiko ekimena da. Plangintza bere osoan prest eduki aurretik etxebizitzok eraikitzea erabaki dute, alokairu sozialaren alorrean eskaera handia delako.
Abenduan Etxebizitzaren Legea onartu zuen Nafarroako Parlamentuak. Eskubide Sozialen lehendakariorde Miguel Laparrak azaldu duenez, horren barruan “gobernuak babesturiko alokairua bultzatu nahi du, orain arte salerosketaren kultura gehiegi zabaldu delako”.