"Behar bezainbeste alditan errepikatuko dugu eskaera, Adif-ek tren inguruko hesitura baldintza ezin hobean izan dezan", esan du Raul Maiza Berriozarko alkateak, atzo eskainitako prentsaurrekoan.
Era berean, udal talde guztiek babesa erakutsi diote hildako umearen senideei, "adorea, elkartasuna, gertutasuna eta babesa" adieraziz. Hori dela eta, tren begizta "berehala" desagertu dadin exijitu dute.
Bestalde, udalbatzak onartu du Berriozar homofobiarik, lesbofobiarik, transfobiarik, bifobiarik eta interfobiarik gabeko herria izateko deklarazioa. Horrez gain, entsegu lokalen inguruko ordenantzaren aldaketa ere aurrera eraman du, bai eta etxebizitzak zaharberritzeko diru laguntza ere.