Arrosadia, Txantrea, Alde Zaharra, Iturrama, Arrotxapea, Buztintxuri, Azpilagaina eta Mendillorriko jai batzordeetako kideak izan dira Udal taldearekin batzartuta, baita Gora Iruñea! Plataforma ere. Foro bat sortzea da ideia eta atzo izandako auzo horietaz gainera Donibane, Sanduzelai eta Etxabakoiz ere hasiko dira batzartzen. Jai herrikoiak elkarlanean antolatzea da xedea eta horretarako protokolo bat eratu nahi dute. Kultura, Hizkuntza Politika, Hezkuntza eta Kirol zinegotzia Maider Beloki eta Mugikortasun eta Hirigintza Ekologikoaren zinegotzi Armando Cuenca izan ziren Udalaren ordezkari gisa bilera horretan.
Zertan oinarrituko da protokoloa? Alde batetik, azken urteetan auzo askotako jaiek izan dituzten isunak ekiditea da helburua. Horretarako, azpiegiturak muntatzeko babesa izanen dute jai batzordeek eta argi eta uraren gastuetarako laguntzak. Ordutegiak ere finkatu nahiko lituzke Udalak, programazioa osatzeko baldintza minimoak adostu eta baimen kontzesioak esleitu.