Decociudad izeneko kanpaina jarri dute abian Zabalguneko Merkataritza Gunea eta Nafarroako Merkataritza Kamerak. Hiriko merkataritza guneak apaintzea da xedea eta modu horretan saltokien jarduna sustatzea. Lehen edizioa du kanpaina horrek eta Carlos III. etorbidean 20 estolda margotzea da asmoa. Urriaren 17an hiriko artistek ekimen hori gauzatuko dute.
Hiriko artistei dei egin diete, aurkez ditzaten euren proposamenak. Horretarako aukera urriaren 4a arte izanen dute. Ondoren, proiektuetako bat hautatu eta estolda horiek apaintzeko aukera emanen zaio egitasmo irabazleari. Bereziki baloratuko dute zerikusia izatea lan horiek merkataritzarekin.
Hiru sari banatuko dituzte behin margo lanak eginda: lehen saria saltokiek eurek hautatutako margolanarentzat izanen da, bigarrena herritarren gustukoenarentzat izanen da eta hirugarrena Nafarroako Kamera eta Ostalaritza Elkarteak erabakiko dute.