San Juan bezperako egunarekin eta udari ongi etorria emateko soka-dantzan ariko dira Duguna taldekoak Curtidores zubian. Tradizio handiko ikuskizuna da soka-dantzarena. Otsailaren 3an San Blas egunarekin ere irteten dira dantzariak eskutik helduta soka-dantzan aritzera. XVI. mendetik dantzatzen da Euskal Autonomia Erkidegoan eta Nafarroan.
Eskuak elkarri emanda dantzariek katea edo soka osatu ohi dute. Dantzarien soka hori zirkulu irekian antolatzen da eta sokaren bi muturretan dauden dantzariek, aurresku edo aurrendari eta atzesku edo azkendari izenekoek gidatzen dute dantza.