Aranzadi-iruñea denon artean herri ekimeneko batzarrak hartu du erabakia: ekainaren 10ean eta 11an eginen dute kontsulta internet bidez, plataforman izena emanda dauden kideen artean. Iruñeko Udala nola osatu daitekeen erabakitzeko, hitzarmenen inguruan kontsulta eginen du modu horretan. "Zein galdera zehatza eginen dugun oraindik ez dugu zehaztu, negoziazioen araberakoa izanen da eta egunotan Gobernua osatzeko iristen garen aurre-akordioaren araberakoa", azaldu dute plataformako ordezkariek.
UPN, PSN eta PP ez dituzte aldaketaren alde ikusten eta hortaz, eurekin ez lukete bat eginen: "Negoziazioak lau alderdirekin egitea litzateke lehentasuna eta herritar guztien aurrean egitea ere bai". Dena dela, guztiekin elkarrizketak izateko aukera ikusten du Aranzadi-Iruñea denon artean taldeak etorkizunean zenbait akordio adosteko jarrerak izan daitezkeelako.
Taldean izanen dituzten elkarrizketen berri eta aurrera eramanen dituzten ekimenen berri emanen dute etengabe, “gardentasuna da gure helburuetako bat eta herritarrak jakinaren gainean izatea”. Ostiralean batzar irekia egin zuten programari buruz hitz egin eta udal gobernua osatzeko izan daitezkeen hitzarmenez eztabaidatzeko.