Iruñeko Udaleko sanferminak berdintasunean taldeak larunbaterako antolatu du Eraso sexistarik gabeko jaien alde leloarekin lasterketa martxa. Sanferminak iritsi baino lehen ekainaren 6a izanen da azken eskailera-maila eta hori aprobetxatuta eraso sexisten aurka eginen dituzten ekimenen baitan kokatu dute lasterketa martxa. Oinez zein korrika egin daiteke entzierroaren ibilbidea, ez da ezinbestekoa aurretik izena ematea parte hartu ahal izateko eta doanekoa da. 12:30etan ekinen zaio ibilbideari: Santo Domingo aldapan hasi eta entzierroaren monumentuan emanen zaio amaiera. Kamisetak banatuko dituzte parte hartzaileen artean 11:00etatik aurrera.
Prebentzioa eta sentsibilizazioa helburu, eraso sexistarik gabeko jaien aldeko kanpaina abian jarriko dute larunbatean. Informazio gune bat ere jarriko dute Iruñean eta ikastaroak eskainiko dizkiete udaltzainei, kazetariei eta babes-zibilaz arduratuko direnei ere. Emakumearen Hiri Batzordetik sortu zen sanferminak berdintasunean ekimena eta gizarte eragile, emakumeen elkarte eta kolektiboekin batera ari dira ekimenak antolatzen.