Iruñeko eremu urdineko autoen aparkalekuak kudeatzen dituen Dornier enpresako batzordeak bi orduko lanuztea deitu du heldu den astearterako gaixorik zeuden bi langile kaleratzeagatik.
Enpresa batzordetik langile horiek berriz har ditzaten exijitu dute eta, honetaz gain, absentismoa gutxitze aldera zenbait neurri har ditzan eskatu dio enpresari.
Alderdi Popularraren lan erreformak langileak kaleratzeko bidea izugarri erraztu duela eta Dornier horretaz ari dela baliatzen adierazi dute enpresa batzordetik.
Lanaren baldintza gogorrez ere mintzatu dira: kalean muturreko tenperaturatan, zutik ordu luzez eta presiopean lan egin behar izatea gaixotasunen eragile direla azaldu dute langileen ordezkariek.
Honekin batera, lan baldintza horietan hobeki aritu ahal izateko behar diren neurriak hartzea enpresaren ardura dela eta argi dagoela ‘langileen kaleratzeak ez duela gure gaixotasunak sendatuko’ adierazi dute.