Gero etaeguraldi hobea dugu euskaldunon hiri buruzagian. Eta horren ondorioz gero eta bizikleta gehiago dabiltza karriketan zehar. Hori horrela, Iruñeko Udaltzaingoak txirrindulariek bete beharreko zenbait arau oroitarazi ditu, prentsa ohar baten bitartez.
Poliziaren arabera, bizikletak baimendutako bideetatik soilik ibil daitezke: errepideak, bide gorriak, eta espaloiak zein oinezkoentzako eremuak, betiere aski zabalak badira, eta abiadura egokian. Bidegorrietan gehienezko abiadura 20 kilometro orduko da. Oinezkoekin partekatzen dituzten eremuetan, 10. Eta doakionez arauak betetzen badira. Bide gorrietan eta seinalea duten bideetan lehentasuna izanen dute bizikletaz doazenek.
Beste arau zenbait ere oroitarazi ditu Udaltzaingoak: 16 urtetik beherakoek kaskoa eraman behar dute nahitaez bizikletaz doazenean. Bizikletek txirrina eduki behar dute, aurreko aldean argia, eta atzekoan islatzailea. Bizikleta aparkatzeko tenorean, prestatutako guneak erabili behar dira. Ezin da bizikleta farola, seinale edo antzeko batean kateatu.