“Agerian geratu da beste behin UPNren Udal Gobernua ez dela gai Iruñea hiri elebiduna dela onartzeko Euskararen Ordenantzan ageri den moduan”, nabarmendu du Geroa Baik. “UPNk hizkuntza paisaiatik euskara baztertu du, baina onartezina dena da, baliabide publikoak xahutzea, plaka horiek bi hizkuntzatan idatziriko beste plakekin ordeztu beharko direlako”. Zentzu horretan, koalizioak gogoratu du Nafarroako Auzitegi Administratiboaren ebazpenak Paseo 25 de Noviembre pasealekua-ren plaka euskarazko izena jasotzen duen beste batekin aldatzera behartu duela Udala.
“Azken urteotan oposizioko taldeok Ordenantza betetzen ez duten plakak aldatzeko aurrekontuen aldaketa bat onartu genuen, baina tamalez gauzatzea UPNren esku dago, partida hori Calle Cendea de Olza Kalea bezalako plaketan xahutzen ari da, elebitasuna errespetatu gabe”.
Geroa Baik bukatzeko esan du, helburua ez dela gaztelania gutxiestea, euskara gaztelaniarekin parekatzea baizik.