Fermin Erbiti
Hauteskunde ondorengo egunotan, hemen deus ez dagoela erabakita entzuten ari bagara ere, dena egina dago. Sozialistak UPNrekin bat eginik, gobernuan edo gobernutik kanpo laguntza emanez. Erabakia zaila da, orain arteko estrategiari eustea delako, eta lehengo eguneko emaitzek ongi azaltzen dutelako zein den estrategia horren ondorioa.
Alternatiba izateari uko egin ondoren, Gobernura sartu edo gobernuari kanpotik lagundu: hortxe sozialisten aukera bikoitza, bakarra, berdintsua. Sartzekotan, zenbait kontseilaritza, norentzat… horiek izanen dira eztabaidagai bakarrak. Baina laguntza zer egiteko litzateke politikari arduratsu batek egin beharreko galdera: esaterako, Unibertsitate Publikoan medikuntza jartzeko, gizarte zerbitzuetarako gastua handitzeko edo hizkuntza politikan erabateko aldaketa ziurtatzeko. Alegia, Anguitak aldarrikatzen zuen programa-programa-programa. Eta hori gobernuan zein gobernutik kanpo egin daiteke, beti ere zerbait aldatzeko borondaterik dagoenean…