Hona hemen manifestaziorako plazaratu duten agiria:
Aldaketa handiko garaia bizi dugu eta aldaketek birkokatzera behartzen
gaituzte. Kinka honetan Nafarroako Gobernuaren jarrerak kezkatu egiten
gaitu. Alde batetik, kanpora begira, Nafarroako Gobernua gizarte anitza –
Lur Anitza-, mundura zabalik, aurreratua eta kalitate eta bikaintasun
eredua dela ikustarazten saiatzen da. Beste aldetik, Nafarroaren barnean,
Gobernuak ez du aniztasuna onartzen, gizartearen zati bati aukerak ukatu
egiten dizkio eta ez dio berdintasunean garatzeko aukerarik ematen.
Nafarroa osoan ingelesezko eskola eskaeraren arabera emateko prest
agertzen den UPNren Nafarroako Gobernuaren aurpegi eskuzabala,
begitarte zeken eta ozpindua bihurtzen da euskara ere eskaeraren
arabera eskaintzea eskatzen diogunean.
Aurpegi atsegin horrek berak, irakasle eta ikasleek ingelesa ikas dezaten
Kanadan egonaldiak ordaintzen dituenak, euskaraz ikasten duten
ikasleendako eskolaz kanpoko jarduera eta hizkuntza sendotzeko
egonaldietarako diru laguntzak izugarri murriztu ditu, erabat
desagerrarazi ez dituenean.
Gobernuaren aurpegi atsegin horrek, Euskararen Foru Legea azken
punturaino betetzen duela behin eta berriz dioenak, 100 eurora txikitu du
eremu ez euskaldunean bizi eta euskaraz ikasteko ezinbestez beste herri
batera mugitu behar duten neska-mutikoen garraiorako diru laguntzak.
Nafarroako Gobernuak beste herri batera mugitzera behartzeaz gain,
haurren eskolatzea gero eta zailago jartzen die hainbeste familiari.
Guk ere nahi dugu gure seme-alabek atzerriko hizkuntzetan hitz egiten
jakitea, baina Nafarroako bi hizkuntzak ongi ezagututa. Hau da, gure
xedea ez da euskara-gaztelania elebitasuna. Elebitasun hori gure semealaben
eleaniztasun zabalaren oinarria izatea nahi dugu, bertako
hizkuntzez gain, atzerriko hizkuntza bat edo biren gaitasuna emanen
diena.
Gobernuak, Nafarroari abangoardia eta kalitate irudia emateko
ahaleginetan, teknologia berriak eta ingelesa bultzatzen ditu, baina nafar
euskaldunen beharrei bizkarra ematen die. Teknologia digitalak Estatuko
nahiz atzerriko telebista asko hartzea ahalbidetzen du, halere gaur
gaurkoz Gobernuak ez du ETB hartu ahal izatea ziurtatzen, tokiko irratitelebistak diruz itotzen ditu eta Iruñerrian euskarazko irrati bati lizentzia ematea etengabe oztopatzen du. Abangoardismo eta kalitateak tokikoa eta hurbilekoa zaintzeari lotuta joan behar dute. Ezin dugu ulertu nolatan ikusi eta entzuten ahal ditugun ingelesez, frantsesez edo arabierazko emanaldiak doan eta, aldiz, euskarazko hedabideak ez ditugu bermatuta.
Krisi larria gainean dugula, gastu publikoa txikitzeko ahaleginak egiten
ari direla sinestarazi nahi digute baina, berriz, murrizketarik latzenak
euskarari dagozkion diru sailetan egin direla ikusi dugu: haurrak euskaraz
eskolatu dituzten familiak, euskaraz ikasten duten ikasleak, euskarazko
hedabideen ikusle, entzule eta irakurleak. Nafar gizartearen zati batentzat
krisia bi halakoa da.
Betebeharretan berdinak bagara, eskubidetan ere berdinak izan behar
dugula uste dugu. Horregatik Nafarroako gizarterengana jo nahi dugu
heldu den martxoaren 28an eginen dugun manifestazioarekiko
atxikimendua eta babesa eskatzeko. Manifestazioa hilak 28, igandean,
eguerdiko 12:00etan eginen dugu, autobus geltoki zaharretik Sarasate
pasealekura, honako lelo honen pean:
“Euskara hautatzeko askatasuna”
“Libertad para elegir el euskera”
NAFAR GUZTIOK BERDINAK GARELAKO
ESKUBIDE ETA AUKERA BERBERAK NAHI DITUGU...
1. ... haurrak geure herrian euskaraz eskolatzeko,
2. ... irratia piztu eta, hamaika aukeren artean, gure inguruko berriak
euskaraz entzuteko,
3. ..., euskara eta gaztelania elebitasunetik mundura zabaldu atzerriko
hizkuntzak ikasiz, eleaniztuna izanez.
4. ... helduen euskalduntzea eta prestakuntza jarraitua euskaraz,
5. ... hango eta hemengo telebisten artean euskarazkorik ere ikusteko,
6. ... kultura eta aisialdiaz euskaraz gozatzeko, eskaintza zabalez eta
berdintasunez.
7. ... euskara ASKATASUNEZ hautatu ahal izateko