Iñigo Astiz
Torpea zara, despistatua, buru handia,
disziplinaz nahikoa argal,
betokerra denboraz.
Pailazo galanta.
Isila isiltasunez, eta analfabetoa
Izenez eta mapez,
Biografiaz sustraigabea,
Eta nazionalitatez La Union S.L.-koa.
Barrabiletan hazka egiten duzu etengabe,
mukizapi erabiliak uzten dituzu
mahaian, logelan, komunean-
zerekin, ez nintzateke ausartuko esatera-,
eta, batzuetan, batzuetan baino ez,
zurrunga ere egiten duzu,
zure tximino ametsetan murgilurik.
Hasperen erretxina,
eta asteburuko lausengari;
Zintzoa zarela esango dute maite zaituztenek,
baina tontoa zara benetan, zure moduko
23 urteko espeziekide gehienen gisara,
Agian, lortuko duzu haiek engainatzea,
baina ez ni, beranduegi dela esango nuke
Lau urte badira-eta lehenengoz
elkar abandon-atu genuenetik,
eta distantziarik batere gabe diot,
horregatik, ezagutzen zaitudalako,
ez dudala sekula izan
zu bezain anaia ederrik.
[audio http://euskalerriairratia.files.wordpress.com/2010/03/inigo.mp3]