Fini inauteriak. Bukatu da bukatu da, bukatu da, akabo. Atzo erre genituen erre beharreko guztiak. Miel Otxin Lantzen, Aldabika Lizarran, Maritrapu Iruñean. Mozorroturik ibili gara egun hauetan, ederki pasatuko zuten batzuek. Baina gaur Hausterre dugu, Garizumaren ilunpean sartu behar.
Hemendik Pazko bitartean bada puska luzea, baina udaberriaren promesa –edo oporrena, edo dena delakoarena- dugu horren ondotik. Ez da zerua izanen; purgatoriotik pasa eta gero, eskertuko dugu, ordea.
Ezker abertzaleak panpina kaputxaduna erre duen ala ez, ezin seguru erran. Azken mende erdiko inauteri odoltsuei bukaera emateko gogoa nabari zaio, bederen. Hobe egiazki hala egin badu; haren garizuma 40 egun baino hagitzez gehiago luzatuko du bertzela.
[audio http://euskalerriairratia.files.wordpress.com/2010/02/aingeruepaltza2010217.mp3]