Ez gara Osasunako atzelari Cesar Azpilikuetaren gol batez ari baizik eta Asier Azpilikueta Euskalerria Irratiko kazetariaren gol batez. Kontua da Azpilikuetak atzo Osasunaren eta Herculesen arteko partidaren kronika idatzia egin zuela twitter-en eta facebook-en. Horren baitan, Masouden gola kontatu zuen, bigarren zatiko 4. minutuan. Azpilikuetaren gol hori historikotzat jo dezakegu; izan ere, Sadar erreka ertzeko futbolzelaitik, euskaraz eta interneteko sare sozialen bitartez kontatzen den lehena izan da. Esan gabe doa kazetariok asko maite dugula historiko adjektiboa.
Bidenabar: Osasunak 1-0 irabaziz Kopako final laurdenetarako sailkatzea lortu zuen. Horietan, Santanderko Racing izanen du aurkari. Ez dirudi aurkari indartsuegia. Gazteluko plazako taldeak eskura dauzka finalerdiak. Ligan, larunbat honetan, berriz, Espanyolen kontra jokatuko du. Euskalerria Irratiak zuzenean eskainiko du norgehiagoka, 17:45etatik aurrera.