Iritsi da Go!azen 9.0 denboraldi berria! Aurten Saioa, Gontzal eta Alain izango dira Basakabiko ikasle berriak, eta haietako batek, sekretu bat gordetzen du. Nola moldatuko dira berriak jada “beteranoak” diren gainerako ikasleekin? Maitasun istorioak, gezurrak, abentura eta musika! Musika eta dantza izango dira aurtengoan ere gure protagonista. Burlatako Kultur Etxean, arratsaldeko 17:00ean eta 19:00ean. Sarrerak: 10€.
Urtarrilean, astelehena 2, asteartea 3 eta osteguna 4, Gayarrek euskarazko hiru ikuskizun eskainiko ditu familia osoarentzat ere. Horrela, 2an, Teatro Paraisok UniKo eszenaratuko du, anaiaren jaiotzagatiko jelosiak haur batengan eta bere inguruan eragin dezakeenaren isla izan nahi duena. 3an, Teatro Gorakadak Zuhaitzak landatzen zituen gizonak antzeztuko du, 2022ko Dramaturgia Onenaren FETEN Saria irabazi duenak. Kontakizun ederrean oinarritzen da: Jean Gionoren «El hombre que plantaba árboles« gizaki, animalia eta landare-erresumaren arteko armoniari egindako kantua da. 4ean, Logela Multimediaren Tartalo, gaztaren sekretua, euskal mitologiako ziklopearen kondaira fantastikoari buruzko istorioa.
Bestelako Argiak jaialdia Ziudadelan izanen da berriz ere, abenduaren 16tik urtarrilaren 8ra, sarrera librea duen adin guztietarako eskaintza zabalarekin. Jaialdiak honako hauek barne hartzen ditu: bideoarte-proiekzioak, argi-instalazio interaktiboak, haurrendako eta familiarteko sormen-lantegiak eta hainbat arte-erakusketa. Proposamenak hausnarketarako, gozamenerako, jolaserako eta emozioetarako gonbita egiten du bideosorkuntzaren bidez eta argia protagonista duen ikus-entzunezko artearen bidez. Informazio guztia webgunean.
Abenduaren 23tik urtarrilaren 8ra (abenduaren 25, urtarrilaren 1 eta 6 izan ezik) goizeko 12:00ean zinema saioa Golem la morean. Euskaraz eskainiko diren filmen artean Rabbit Academy eta Nire Zirkua ikusgai egongo dira. Sarrerak: 5€ eta 1€ko gehigarria 3D filmetarako.