"Gizarte osoa interpelatzen duen arazoa" da sakabanaketa, LAB sindikatuko Nafarroako koordinatzaile Igor Arroyok esan duenez.
"Une honetan Europan dagoen giza eskubideen urraketa larrienetako bat da, errefuxiatuen dramarekin batera. Jendarte osasuntsu batek ezin du hori gehiago onartu, horregatik, mobilizatzeko deia egiten dugu. Bihar Bilbon izanen gara". Giza eskubideak, konponbidea, bakea. Euskal presoak euskal herrira lelopean eginen den manifestaziora joateko deia luzatu du sindikatuak; bidea, LABen ustez, ez da hor bukatzen, dena dela: "baina bihartik aurrera jarraitu behar du mobilizazioak kalean, baita lantokietan ere".
Lantokiak aipatu ditu Arroyok, hain justu, Ireki kolektiboak dispertsio politiken kontrako sinadura bilketak eginen dituelako lantegietan, datozen asteotan.