92 urteko emakumea hil zuen gizon batek; oraingoan, ama-semeak ziren. Horregatik, kalera atera zen atzo Euskal Herriko mugimendu feminista, Euskal Herriko 2017ko lehen erailketa matxista izan dena gaitzesteko. "Emakumeen kontrako indarkeria da. Erabateko arbuioa azaldu nahi dugu", irakurri zuten Iruñeko udaletxe plazan egindako elkarretaratzearen ostean. Dozenaka lagun elkartu ziren indarkeria matxista arbuiatzeko.
"Emakumeen kontrako indarkeria sistema kapitalista eta patriarkarra mantentzeko ezinbesteko tresna da, sistema horrek berak sortu dituen erlazio eta botere harremanak sortzeko ezinbestekoa. Indarkeria matxista arazo soziala, ekonomikoa, kulturala da". Gauzak horrela, "autodefentsa feministarako" deia eginez amaitu da kontzentrazioa.