Abiadura Handiko Trena eginen ote denetz. Hori izan da PSNk Nafarroako Parlamentuan gobernuari galdetutakoa. Eta erantzuna: baietz. Ezbairik gabe erantzun dio Uxue Barkos Nafarroako presidenteak. Trena Mediterraneo-Kantauri korridorearekin lotuta egonen dela azaldu du, eta, are gehiago, Euskal Y-arekin lotura izanen duela. Nolanahi ere, "geldi" dago proiektu, "diru falta" dela eta. Geroa Bai eta PSN ez ezik, UPN eta PP ere trenaren alde azaldu dira.
Lauko gobernuan ez dago adostasunik gaiaren inguruan. EH Bilduko, Ahal Duguko eta Ezkerrako indarrek adierazi dute AHTa ez dutela gelditu gobernuan lortutako adostasuna medio, baizik eta "ekonomikoki bideragarria ez delako", une honetan, Geroa Bairen aburuz.
PSNk eskua luzatu dio Geroa Bai
PSNk "beti" eginen du AHTaren aldeko apustua. Hori esan dio Maria Txibitek Barkosi; exekutiboak proiektuarekin aurrera egitekotan, euren laguntza izanen duela. Ingurumari horretan, Madrilekin bestelako akordio bat lor dezakeela iradoki dio.
Adif-ek 45 milioi euro zor dizkio Nafarroari, honek aurreratu egin zituelako AHTa eraikitzeko xedez. Barkosek itzultzeko exijitu du. Ildo berean, AHTa "oraingo erronketara eta beharretara" moldatu behar dela aipatu du.